مكنش في وقت حتى إنو الواحد يبكي على موت مسعود، الضربة اللي قتلت مسعود كانت بالأغلب ضربة تحذيرية قبل الضربة الكبيرة. أحمد قال: “فكرنا على طول انهم رح يستهدفو البيت كله بعد هيك”. هناء اللي كانت على كرسي متحرك بسبب إصابتها بشلل نصفي كان لازم تنحمل. أحمد حملها بس بعد حوالي تلاتين متر انقطع نفسه، فأجو ولاده التنين سعيد وبلال عشان يساعدوه يحمل هناء. كل العيلة هربت على الشارع بما فيها اطنعشر طفل وتلات زوجات وأحمد وأبوه وأمه الختايرة. انضربو بصاروخ من طيارة بدون طيار تقريبا ستين متر بعيد عن بيتهم.

أحمد تصاوب وضل بوعيه رغم إنه كان مصدوم: “كان بدي أتصل بسيارة إسعاف بس مكنتش بقدر أتحرك”. تطلع حواليه وشاف حمام دم: كل حبايبه منَتوَرين حواليه متصاوبين وبنزفو وكل واحد فيهم مرمي بجهة من الانفجار. بعد شوي صار يقدر يتحرك فصار يحاول يركض بيناتهم يشوف شو صار فيهم.

جارهم وقريبهم محمد اللي عمره عشرين سنة أجا يركض عشان يساعدهم. في اللحظة اللي وصل فيها لموقع الانفجار قامت طيارة بدون طيار بضرب قذيفة تالتة عليهم قتلت محمد. وصلت سيارات الاسعاف اخيرا. هناء وولادها كانو بموتو واحد ورا التاني- إبراهيم و سعيد ومحمد وأخوهم غير الشقيق بلال. مينا أختهم الصغيرة اللي عمرها أربع سنين تصاوبت. في المستشفى كانت قايمة القيامة ومافيش دكاترة كفاية عشان يعالجو الاصابات، اضطر أحمد أنه يقيم الشظايا من جسم مينا بنفسه.

مينا

إبراهيم كان الأخ المفضل عند مينا اللي عمرها أربع سنين ولساتها بتنام في تخته. ما بتقدر توقف حكي عنه لأي حدا بدو يسمعلها. بتحلم فيه. أمها آمنة تذكرت إنها مرة فاقت في نص الليل وسألت: “وين راح ابراهيم؟”. مينا البنت الأمورة الزغيرة عمرها هلأ خمس سنين بتصيبها نوبات غضب كتيرة بتقدرش تسيطر عليها. مرات هادا الغضب بكون موجة على أمها. مينا بتلوم أمها على قتل اخوتها غير الاشقاء وبتقلها: “انتي هربتي وما أخدتيهم معاكي! ليش هم ماتو واحنا لأ؟”.
بيوم قالت مينا: خلينا نروح نزور خالتو هناء اللي صارت بنت زغيرة. عيلتها تعودت على الطلب هادا. سمية، أخت مينا غير الشقيقة شرحت ليش مينا بتقول هيك: “الستات من عيلة الحشاش قرروا يسمو الاولاد المولودين جديد على اسم أفراد عيلة الحشاش اللي انقتلو في الهجوم الاسرائيلي، مينا بتآمن إنو أفراد عيلتها ما ماتو لكن صارو أطفال زغار مرة تانية عشان يقدروا يكبروا معها”.