طلال فقد أخوه التوم عبد الله اللي عمره تلطعشر سنة واخوه عبد الرازق اللي عمره تسعطشر سنة!

ابنهم طلال بلعب كرة قدم على الكمبيوتر وبرفعش عينو عن الشاشة. واذا رفع عينيه عن الشاشة نظرته الشاردة رح توقع على صور اخواته الميتين: اخوه التوم عبد الله واخوه عبد الرزاق. صعب الواحد يعرف اذا الولد قاعد بستمتع باللعبة ولا لأ حتى انه ما ببتسم الا بصعوبة.

الليالي اسوأ إشي وطلال بقدرش ينام. راسه بوجعه والكوابيس بترجعلو. ابن التلطعشر سنة بستنى يطلع الفجر وعلى الساعة أربعة الصبح بترك البيت وبروح يسبح في الشط القريب منه هو وكم واحد من صحابو. كان يسبح بالعادة مع عبد الله، بس السنة الماضية في طيار إسرائيلي قصف بيت عيلتو بصاروخ. طلال كان قدام البيت وشاف الصاروخ وهو نازل على بيتهم. وبدل ما يهرب منه ركض لجوا البيت عشان يحذر إخوته. بس مكنش في وقت كفاية. اخواته التنين وابن عمه الصغير وبنت أخته انقتلو وراس طلال انشق كمان.

عبير فقدت بنتها روان

عبير أخت طلال الكبير اللي مات جوزها قبل سبع سنين لما كان يحفر بنفق في رفح على الحدود بين غزة ومصر. هدول الأنفاق اللي سكرهم النظام العسكري المصري حاليا، كانو شريان حياة لأهل غزة واقتصادهم المحاصر. بعد موت جوزها عبير رجعت لبيت أهلها، فعمليا طلال كبر وهو يلعب مع بنت أخته روان وولاد أختو التنين يحيى وأحمد.
روان كان عمرها تسع سنين وكانت أكبر وحدة باخوتها، وتدير بالها عليهم وتساعد امها عشان تعوض عن فقدان أبوها. كانت كمان تاخد الأولاد على المدرسة وتدير بالها إنهم يخلصو واجباتهم المدرسية وتجيب اغراض البقالة على البيت. أحمد اللي هلأ عمرو خمس سنين شبط على حضن امو اللي عبطتو بحنية وقالت: “روان كانت فاهمة وضعنا وفاهمة إنو أبوها ميت وإني محتاجة مساعدة. كنا نقضي كتير وقت مع بعض”.

عبد الهادي وعطاف فقدو ولدين، عبد الله وعمره  تلعطشر سنة، وعبد الرازق وعمره تسعطعشر سنة، وحفيدتهم روان وعمرها تسع سنين وابن أخوهم محمود وعمره تمن سنين.

قتل العدوان على العيلة ولدين من اولاد عطاف عبد الله وعبد الرازق، أما ولادهم الأربعة الباقيين فتصاوبو. محمد ابنهم واللي عمرو تمنية وعشرين سنة بيعرج وهو ماشي في البيت. أغلب الوقت هو ساكت، بس بعدين بنفجر غضب بسبب خسارتهم اللي مش عارف شو مبررها. هو بنفسه اتكسروا إجريه التنتين وفيه شظية بجسمو. عطاف بتحكي وهي بتبكي: “كنت أدور لمحمد على عروس لما العدوان بدا. كان مفروض انه ينتقل هو وعروستو على وحدة من الشقق اللي في بيت العيلة اللي جددناه عشانهم. بس بدل هيك لما انضربنا سقف غرفة نومو وقع على راسو”.